青山道長沙灣段-新華茶餐廳

掃食堂-小雲提供

呢間新華茶餐廳，位於青山道，長沙灣段，開業多年，住附近無人唔識。

小弟幫襯有3年多，基本一坐底講七個字攪掂。特餐，方包，熱奶茶。特餐就係小弟最愛：沙爹牛肉麵，火腿奄列，餐包。呢個係茶記都有嘅食品，小弟去到邊食到邊，但小弟敢話呢間好味度全港數一數二。

沙爹汁是自制，唔係'黑蚊蚊'得個鹹字，新鮮牛肉，日日自切，唔太韌唔太淋有牛肉味，火腿奄列足料，多火腿裡面半熟，非常好味。

企堂透露以前生意好，每日收工成班齊齊切牛肉5-8斤不等，日日切日日清，而家附近多開咗好多新餐廳，競爭大，生意少咗，舖租加，所以由幾年前$24個特餐到今日$31,無計。

心水清嘅朋友會發現，小弟一坐低講嗰七個字，同幅相有點不同。無錯，個餐係可以揀方包定餐包，如果鐘意食餐包嘅朋友，就講五個字攪掂。

新華茶餐廳仲有另一款食品想介紹，不過留返下次先，今集係咁多！