羅漢果 – 加菲哥

羅漢果 – 加菲哥

近日喉嚨痛又有幾聲咳，感冒初期徵狀出現，唔想食西藥，所以煲羅漢果水試下，效果又唔錯，值得推介。

上網好容易就搵到相關羅漢果療效，主要包括：益肝健脾，有清熱解暑、化痰止咳、涼血舒骨、清肺潤腸和生津止渴等功效；可治喉痛﹑聲沙﹑氣管炎、哮喘、咳嗽、胃熱、便秘、急性扁桃體炎等症。

仲有原來羅漢果的甜度係甘蔗的三百倍，但所含卡路里就極低，每日飲一大柸都唔怕。

做法非常簡單，羅漢果一個洗淨後破開，凍水放落煲，用約三公升水煲至水滾後十五分鐘。熱飲或冷藏凍飲均可。 藥材舖賣約$5一隻，夠飲幾日。

一樂燒臘飯店 - 加菲哥

一樂燒臘飯店 - 加菲哥

一講到食燒鵝，絶大部份人都只係識深井，但我最近去深井每間都食過，普普通通……….唔洗再入去同人迫。大埔呢間[一樂燒臘飯店]的燒鵝先正，晚市去食，燒鵝不斷新鮮出爐，每張枱都例必叫半隻或全隻，愈多人叫就愈新鮮，親眼見師傅斬都斬唔切，基本上隻鵝一燒完就即斬上枱，正! 店內仲有其他小菜亦非常有水準，所以晚晚都坐到爆。如果你都覺得深井燒鵝不外如是，就去大埔試下呢間比較下，可能有驚喜，但記得要晚市去食。

地址：大埔大埔墟大明里5號寶華樓A座地下

黑芝麻 加菲哥

黑芝麻 -加菲哥

一提到美容、抗衰老等產品，絶大部份女士都諗到買護膚品同幾百蚊一樽的保健食品，我今日就介紹一種人人都買得起的黑芝麻，同樣有相同功效，但價錢平到笑。

黑芝麻中維生素E的含量好高，可以抗衰老，而鐵質亦豐富，可以促進血蛋白的再生，預防缺鐵性貧血。

建議食法：黑芝麻 + 海帶 = 美容 + 抗衰老
黑芝麻適合同海帶食，因為芝麻能改善血液循環，降低膽固醇，而海帶就可淨化血液，促進因狀線素合成，兩者同食，就可有美容同抗衰老較佳效果。

但我就貪方便，每日直接一茶匙黑芝麻沖水飲，中醫話可有效改善白髮，即管試下。

P.S. 記得黑芝麻要磨碎後食先有效，相中是已磨的黑芝麻粉

白熊咖哩 – 加菲哥

白熊咖哩 – 加菲哥

六月尾荃灣廣場開左[一田]，頭一個月人流多到爆，連埋隔離灣景廣場的[Aeron 吉之島]，人氣直迫沙田新城市廣場。我諗極都唔明，兩間野賣的產品九成一樣，但點解兩間都咁旺場？有人知道就請回覆解答。

[一田]內開左兩間食店，一間食咖哩的，晚飯時間唔洗排隊，另一間食拉麵的，晚飯時間我排左30分鐘，兩間我都試左，選擇推介[白熊咖哩]而不是要排半小時的味精拉麵。

叫左份[吉烈豬排奄列咖哩飯]，其實整呢個飯唔算難，豬排夠厚身，炸塊豬排炸得夠鬆軟多汁，淋上味道調較得剛剛好的日式咖哩即可，但就係因為佢的奄列蛋包飯令到成碟飯加分不少！佢店內仲有其他咖哩飯，要去多幾次試下，不過價錢都唔平，淨碟頭飯$70大元。還有我頗喜歡店內的枱椅，有幾會大家留意下。

地址：荃灣大壩街4號荃灣廣場4樓一田超市百貨

周記豬油渣面-大砲仔

周記豬油渣面-大砲仔

星期五約左朋友晚飯, 仲有大把時間, 又怕餓太耐會胃痛, 大炮仔放工諗住食D野,
坐車出去睇下高登, 討論近豬油渣面, 即刻豬油渣感覺出哂黎.好想食,即刻坐地鐡去深水埗整番碗先.

由於剛6點, 可能好多人都未放工, 人唔多, 即刻叫一碗, 枱面有好多配料, 魚露,蔥粒,辣冬菜, 普通冬菜, 正呀.
碗面黎到, 油渣份量夠, (之前食過.夠膽死一碗面得兩三條油渣), 加哂所有配料, 食得.

油渣夠新鮮, 一咬落去充滿豬油香, 豬油脆脆地, 好回味.
之後對面黎左一男一女, 叫一豌多渣(原來可以叫多渣, 大碗仔感覺今次蝕了)

$25一碗, 食到好滿足, 不過深水埗真係超多男人加上熱到爆炸, 食完即走.

地址:深水埗福榮街117號地下 (近桂林街)

巴鮮七味

巴鮮七味 - 加菲哥

之前都介紹過荃灣最好食的米線 – 雲貴川風味，但我昨晚諗住去食時發現正正隔離新開一間米線店 – 巴鮮七味，擺明頂到行，見佢新開張就即管試下。

叫左碗米線配料主要有腩肉、蘿蔔及炸醬，先飲一淡湯，湯底合格不會覺得太多味精，但就覺得唔夠香濃。腩肉……..唔合格，但蘿蔔及炸醬還算不錯，可能食慣左老字號的雲貴川，相比之下，巴鮮七味的 [腩肉] 已經被比下去了。但新店開張關係，送汽水及小食，感覺就抵食夾大件。

總括而言，呢間新店的米線是不錯的，如果大家是食開雲貴川的話，可以去食返次比較下。


個人意見，如果10分滿分，雲貴川有9分，巴鮮七味有7分。大家試完回來比下意見!

Menya Yamashita 麺家山下

Menya Yamashita 麺家山下—大炮仔

大炮仔一直鍾意幫襯小店, 食物水準唔係最重要, 而係一份人情味,有錢買唔到 嘅

日式拉麺近年香港開左好多, 好多都好有水準, 有D仲要排隊成個鐘先可以食到. 但我唔會排囉, 浪費時間.

大炮仔喜歡日本拉麺, 因為好欣賞拉麺個湯, 個湯係先係拉麺嘅靈魂, 好多拉麺師傅用八九個鐘去淆個湯底,好有誠意.

上水有間日本拉面小店Menya Yamashita麺家山下, 地方真係好細, 有冷氣嘅位置, 只可以坐六個人, 出門口仲要講唔該借借先得. 但係一直都有好多客人,

老闆係日藉夫婦, 男嘅負責廚房, 女嘅責客人落單,清潔. 大炮仔幫襯當日, 女揹住兩歲小朋友出出入入, 滿頭大汗服務客人,
兩口子好辛苦, 離鄉別井, 就是為了生活, 個一刻有D感動.

係日本好多呢類型嘅小小拉麺店, 只有一兩個人主理, 去日本好喜歡幫襯, 因為可以真真正正感受當地生活. 感受下地道人食咩, 扮下當地人.

位於上水嘅山下拉麺沒有華麗的外表, 裝修, 只有一碗有誠意嘅拉麺同兩夫婦, 湯底唔係過份濃郁, 而家有D拉麺店, 以為整到個湯濃味, 就叫勁, 食完番屋企口喝到死, 味精極重. 山下拉麺, 岩岩好, 大炮仔食完碗麺,仲要飲埋個湯先爽

喜歡食蛋既朋友, 可以試下, 佢隻流心的雞蛋好有驚喜.

幫襯呢D小店, 唔會有盪氣迴腸,驚為天人既感覺,但這碗麺充滿住人情味, 食完番屋企, 再睇日劇 深食食堂, 簡直完美嘅一夜.

地址: 上水新康街63號地下D3-D4號鋪

美而廉餐廳 – 大炮仔

美而廉餐廳 – 大炮仔

大炮仔十多年前係油麻地讀書, 經常幫襯係洗衣街既美而廉, 一間舊式西餐廳, 平民化既價錢, 驚人既份量, 100%符合大炮仔既要求. 每每大炮仔途經旺角,肚餓既時候, 就一定會諗起美而廉, 因為深信一定可以食得好飽, 好滿足, 又唔貴.

可能大家會覺得佢地D扒既肉質, 用粉腌得過量, 但係呢隻質感, 就係兒時既味道, 十幾廿年前, 父母帶小朋友去西餐廳鋸扒, 就係食呢種又林又無牛味既牛扒,. 香港現在食物質素不斷上升, 香港人對食物既要求愈黎愈高,⋯⋯ 呢D舊式牛扒, 相信好快就會消失.

美而廉已經唔係洗衣街, 搬了去大角咀, 大炮仔專承去試一試, 裝修已經變了一般茶餐廳, 沒有了以前既懷舊情懷, 老闆伙計依然一樣, 服飾比以前舊鋪好添.

今次大炮仔叫了一個鐡扒T骨牛扒, 剛遇上佢地做9折優惠, 加加埋埋.都係幾十蚊埋單, 入餐廳到食完,出餐廳腰圍闊了兩寸, 呢種感覺好滿足.

一間餐廳1963年開業到而家, 好值得大家支持一下, 佢係50年間, 填飽了幾多人個肚,令每個客人步出餐廳有滿載而歸既感覺, 已經值得表揚.

地址:大角咀塘尾道51號地下

蛋花蕃茄麵 - 加菲哥

 蛋花蕃茄麵 - 加菲哥

最近大炮仔寫左[養生篇]，介紹左[牛蒡茶]的功用，絶對值得支持同推介，今次我再推介另一保健食譜，首選容易在街市買到同埋容易煮又好食。

蕃茄營養多都嚇死人，我都係睇書先知，同大家分享一下。蕃茄含有蘋果酸、檸檬酸、胡蘿蔔素、維生素B1 & B2、維生素C、維生素P、菸鹼酸等。蕃茄中的維生素C、蕃茄紅素及果酸可降低膽固醇，預防動脈硬化同心臟病，蕃茄紅素仲可清除體內自由基，具有防癌抗衰老功效。

⋯⋯ 蕃茄最好配雞蛋煮餸，因為蕃茄缺蛋白質，而雞蛋就缺維生素C，正可互補不足，但切記蕃茄不可配南瓜一起吃，因為南瓜含有維生素C分解酶，會把蕃茄的維生素分解，食左就等於冇食架啦!

所以我今日介紹食譜就係 – 蛋花蕃茄麵


做法:

1) 蕃茄洗淨，去蒂，切月牙瓣，雞蛋一隻，攪勻。
2) 開火用植物油炒香蔥花和胡椒粉，加入適量水燒沸。
3) 加入一人份量麵條，煮至八成熟，倒入蕃茄瓣煮至軟爛，倒入蛋液，最後落鹽調味即成。

P.S. 今次張相借用人地Blog，見諒。

相片來自
http://blog.yam.com/peray1/article/29175177

好麵線

好麵線 - 加菲哥

近年因為油尖旺一帶已經被大量旅客迫爆，根本放假一定唔會出去行街，但因為工作關係，間中都要出去同人迫下順便睇下有咩好野食可以介紹下。

今日介紹呢間食店，食過兩三次覺得佢的羊肉串燒最正，即叫即燒要等耐少少，最緊要係10蚊串燒到超香羊味，已經超值啦! 你去街邊食串魚蛋都10蚊，呢間羊肉串燒得咁靚，仲有冷氣涼仲想點。

P.S.老老實實呢間的米線非常普通，唔可以有太高要求，想要食正米線就去我上次介紹的荃灣雲貴川!



地址: 油麻地眾坊街59號B舖

雲貴川風味

雲貴川風味 – 加菲哥

停左幾日冇出食評，唔係偷懶呀，只係食左幾間都不外如是，不值一提吧了。只好去返老字號食店，信心有保證。

荃灣區食米線的食店多得驚人，我懷疑仲多過7仔，但今次介紹呢間我肯定係成個荃灣冧巴溫！此店在荃灣四陂坊，舖面不起眼，傳統老店，店內只得米線供應，連小食都冇(可能有，但永遠冇人叫)。而米線的配菜亦不算多選擇，但就是做得出色。特別推介的配菜有五豬：豬頭肉、豬腩肉、豬耳、豬肚同豬腸。由於是自家制作，味道特別香濃。今次點左豬腩肉配紅腸同腐竹，湯底要少辣，又是非常滿足的一餐！

溫馨提示：我次次食都要排隊，不論任何時間，大家要有心理準備。

地址：荃灣四陂坊14號地下

蛋白燉鮮奶

蛋白燉鮮奶-大炮仔

係呢個年代，基本上係無可能唔識煮飯，只係你有無心機上網做下功課搵下食譜，只要肯付出一定食得落。

前排香港糖水甜品鋪週街都係，唔知幾時開始香港人無啦啦鍾意左食糖水甜品。每一次大炮仔見到個餐牌心裡面就好不滿，一碗緣豆沙成廿蚊，燉奶成三十蚊。

今晚大炮仔心血來潮想想食燉奶，飯後就走去某大超市買盒北海道牛奶，再番屋企上網搵下食譜，咁就搞掂，過程都唔需要一個鐘，成本只係幾蚊一碗，質素同糖水鋪有得揮，又慳番唔少。

材料: (4人份)
1. 牛奶 500ML
2. 砂糖 4茶匙
3. 蛋白 4隻

( 換算很簡單， 2人份的就是牛奶250ML, 砂糖2茶匙，蛋白2隻)

做法:
1. 先將牛奶用微波爐弄至微暖（千萬不要滾呀，微溫就可以了。）
或是　（我採用的方法：多時間哎嘛）
將牛奶用隔熱水座暖，加入砂糖慢慢攪拌至砂糖完全融化，這時候可以先試甜度，加多加少砂糖視乎你想要少甜多多甜呀。之後備用。
2.　把蛋白慢慢發勻，之後用篩隔去蛋白泡及蛋筋，這個動作我重覆兩次，避免到時有泡泡及不夠滑。
3. 把隔好了的蛋白倒入牛奶內慢慢攪拌混合，之後倒入蒸碗內
4. 如果還有泡泡，這時就用湯匙把泡泡盛走。
5. 用保鮮紙或錫紙封蓋於蒸碗上，　當然秘訣是不要倒太滿於蒸碗內，因為用保鮮紙封蓋著蒸時，可能上面有蒸氣會有少許下墜，如果牛奶蛋白汁太滿，就大機會會貼在一起。
而且用保鮮紙封蓋時，一定要緊緊拉扯著保鮮紙蓋下去，太鬆當然會下墜，不難明吧。
同時，保鮮紙不能過長，放到蒸鍋內，保鮮紙長到浸到水裡，水蒸氣也一定會沿保鮮紙滴入封蓋好的牛奶蛋白內。
我比較挑剔，所以更加會用橡膠圈住，萬保一失。
6. 將鍋倒入水及放入蒸兜，水滾後就可以放入封好的牛奶蛋白，蓋上蓋，用中火蒸15分鐘，把形狀定型後再轉小火蒸5分鐘，開蓋，拿出後才熄火。　（蒸時有時要用少少蓋等蒸氣滲少出來，一次半次就可以了。）

雞蛋焗魚賜

雞蛋焗魚賜-大炮仔

膽固醇, 三個字可能好多都市人都好可怕, 但係大炮仔一於有理無理食左先算, 最多之後日日做運動補番數(係之後...但係未開始). 雞蛋魚腸 基本係同膽固醇掛勾, 好多人都唔敢食。可以食到巳嘅食店已經愈來愈少，為免一道廣東名菜失傳，大炮仔決定係網上搵一搵食譜，試一試親手整一整呢個廣東名菜，異常成功。

可惜係屋企無人欣賞，大炮仔一個人食哂，第二日訓醒仲頂住頂住，好鬼辛苦。



雞 蛋 焗 魚 腸
材 料 ： 鯇 魚 腸 1 大 條 、 雞 蛋 4 隻 、 油 條 1/2 條 切 片 、 白 醋 1/4 茶 匙 、 陳 皮 / 薑 粒 / 芫 荽 / 蒜 片 各 1/2 茶 匙 、 生 粉 1/3 茶 匙 、 胡 椒 粉 / 麻 油 各 少 許

做 法 ： 先 將 鯇 魚 腸 洗 淨 去 內 臟 ， 燒 滾 水 加 入 白 醋 ， 放 入 魚 腸 略 滾 ， 然 後 下 白 鑊 煎 乾 備 用 ； 陳 皮 / 薑 粒 / 芫 荽 / 蒜 片 爆 香 ， 連 同 油 條 放 入 器 皿 ； 雞 蛋 拂 勻 ， 將 3/4 蛋 液 倒 入 器 皿 ， 下 生 粉 / 胡 椒 粉 / 麻 油 拌 勻 ， 蒸 5 分 鐘 後 ， 倒 入 其 餘 蛋 液 / 魚 腸 ， 再 蒸 5 分 鐘 即 成 。

雞蛋焗魚腸
【材料】
鯇魚腸二副
油炸鬼四分一條
雞蛋四隻
清水半杯
薑絲一湯匙
果皮四分一個(浸軟刮去白瓤切幼粒)
蒜茸二茶匙
白醋適量

【調味料】
幼鹽半茶匙
紹酒一茶匙
薑汁一茶匙
胡椒粉半茶匙
麻油半茶匙

【做法 】
(一)鯇魚腸去油脂及魚膽，魚肝洗淨切片，魚腸剪開，用鹽及生粉洗淨，以 白 醋 水 去 腥 味，切段，瀝乾水份，待用。
(二)雞蛋加水成蛋漿，加入魚肝、魚腸、薑絲、果皮、蒜茸、調味料拌勻，倒入已塗了油的瓦砵內。
(三)油條切薄片，放在雞蛋上，隔水蒸十五分鐘，再 放 入 攝 氏二百五十度焗 ，爐焗五分鐘，即成

魚鱻魚湯專門店

魚鱻魚湯專門店 – 加菲哥

今日又係介紹荃灣,路德圍有大把好野食,有一間造魚湯米線同泡飯非常出色,賣點係新鮮的魚湯底,仲有魚鮫,炸魚餅,整條上的黃花魚…..不能盡錄.
除左魚夠鮮之外,此店的鮮茄肉碎湯飯另我一試上引,今次亦都要再食,價錢合理,每次我都提早去食免得要在門外排隊. 而家香港有水準的食店好多都因貴租而被迫結業,希望呢間唔會啦.

地址: 荃灣路德圍30號地下

生炒糯米飯

生炒糯米飯 - 加菲哥

而家出去食糯米飯,幾乎冇可能食到真正生炒的糯米飯,全部都係蒸! 有見及此,我就自行嘗試到滿意,現再同大家分享.

二人份量材料: 糯米, 乾瑤柱6粒,蝦乾,臘腸兩條,花生.
 準備:
 1) 糯米浸水6-8小時備用
 2) 乾瑤柱同蝦乾浸水備用, 保留浸完的乾瑤柱同蝦乾水
 3) 乾瑤柱,蝦乾同臘腸切粒
 4) 醬油: 生抽,老抽,糖

 做法:
 1) 乾瑤柱,蝦乾,花生同臘腸粒落鑊炒香,起鑊備用.
 2) 糯米落鑊快炒,炒到就快乾身時,加入乾瑤柱水,再快炒到乾身,加入蝦乾水,再重覆炒至糯米全熟,如乾瑤柱同蝦乾水用完,即加入清水.
 3) 最後加入已炒香的乾瑤柱,蝦乾,花生同臘腸粒,及醬油,炒至乾身完成.

 P.S 最後起鑊前可以葱粒增加香味.

炒麵王

炒麵王 - 加菲哥

昨日忙到人都癲,冇一餐食得滿意,返到屋企又想食宵夜,梗係整個麵食下.

大家唔好睇小即食麵,市面上大部份都好難食,除非你完全冇要求就另計.

今次我介紹呢個炒麵王可以一試,份量足,麵硬度適中,我仲加多兩條熱狗腸.
食飽之後即刻訓,真係爽死~~~

荃灣津味雲吞麵

荃灣津味雲吞麵 – 加菲哥

話說有次招呼朋友到家中火煱,見呢間店有新鮮外賣雲吞水餃,雖然價錢偏貴但即管一試,結果亦相當滿意,所以今次專程到此店堂食順便介紹下.

叫左個雲吞河都幾大碗,雲吞蝦肉新鮮爽口,河粉夠飽肚仲送粒豆腐乾,岩晒我.

雖然係幾好食,但外賣一打雲吞要$30蚊,即$2.5蚊粒都唔平.同埋呢間食店重新裝修,我想講裝修得好老土………

上水之最-梅菜扣肉

掃食堂-大砲仔

梅菜扣肉,令人又愛又恨。好多人見到都驚，有人愛不惜手。大砲仔當然係後者。

上水勝記一間絕對唔起眼嘅餐廳,路過見到個門面你根本完全唔會入去, 但多年前經同事推介下,令我也是常客。舊式粥店在香港愈黎愈少，勝記其中一個賣點就係有生滾粥食，加上即拉腸粉，都可以的，但粥底味精不少，食者自己小心，哈哈。

先講番舊扣肉，我敢講勝記嘅梅菜扣肉肯定係上水之最，佢嘅扣肉有咬口，成寸厚，肥豬肉有彈牙嘅感覺，一試難忘，加上勝記嘅梅菜扣肉，比其他地方食到嘅多了一份酒香，真係要試下，但係試之前，請先準備好心理狀況，切勿帶剛初相識嘅女朋友或追求中嘅女士去，因為環境真係有點差，吾係人人接受到，哈哈，去過嘅人就會明白。

地址：上水新勤街28-30號地下

荃灣[東哥點心]

荃灣[東哥點心] - 加菲哥

星期日晏起身,下午茶時間想食酒樓點心例牌慘過輸街証,即刻走去沙咀道食[東哥點心]唔洗等位,茶餐廳格局地方企理,仲有我最鍾意的凍檸茶.

此店食過兩三次,最正係籠仔蒸飯同蝦餃.蒸飯夠份量而且非常新鮮,最X憎D酒樓鳳爪排骨蒸飯D飯白X過白姐姐,完全冇食慾.此蒸飯絶對有料到,有機會自己去試下.

蝦餃亦係水準之作,蝦肉又係非常爽口彈牙.

 地址: 荃灣沙咀道309號

青山道長沙灣段-新華茶餐廳

掃食堂-小雲提供

呢間新華茶餐廳，位於青山道，長沙灣段，開業多年，住附近無人唔識。

小弟幫襯有3年多，基本一坐底講七個字攪掂。特餐，方包，熱奶茶。特餐就係小弟最愛：沙爹牛肉麵，火腿奄列，餐包。呢個係茶記都有嘅食品，小弟去到邊食到邊，但小弟敢話呢間好味度全港數一數二。

沙爹汁是自制，唔係'黑蚊蚊'得個鹹字，新鮮牛肉，日日自切，唔太韌唔太淋有牛肉味，火腿奄列足料，多火腿裡面半熟，非常好味。

企堂透露以前生意好，每日收工成班齊齊切牛肉5-8斤不等，日日切日日清，而家附近多開咗好多新餐廳，競爭大，生意少咗，舖租加，所以由幾年前$24個特餐到今日$31,無計。

心水清嘅朋友會發現，小弟一坐低講嗰七個字，同幅相有點不同。無錯，個餐係可以揀方包定餐包，如果鐘意食餐包嘅朋友，就講五個字攪掂。

新華茶餐廳仲有另一款食品想介紹，不過留返下次先，今集係咁多！

荃灣區最好的焗飯-普洱

荃灣區最好的焗飯 - 加菲哥

作為[掃食堂]中堅分子,首次出帖必以自己地頭作出推介. 如果係荃灣人就必定知大壩街有好幾間食店,但能夠返啅的唔多.荃灣大壩街的[普洱]已幫襯超過兩年,每次例牌 - 茄汁焗雞扒蛋飯 + 凍朱古力普洱!焗飯即叫即焗,份量夠,中間加隻緊緊熟雞蛋的確一流.仲有柸凍朱古力普洱又係另一傑作.此店由一班年青人主理,能保持水準已值得一讚! 店內餐牌食物及飲品選擇出奇地多,好難有其他同類食店多得過佢.
個人意見:如果此焗飯可以用炒底飯就完美.

地址:荃灣大壩街59號地舖

瀝源村街市燒味店

掃食堂-大炮仔提供

今時今日$17可以食到咩，一碗雲吞面賣緊$2X，係港島區食個迷你蒸肉餅飯要成$4X，一般打工仔生活真係好艱難。

我為大家推介一間位於沙田瀝源村街市既燒味店，有外賣飯盒賣，單拼$14，雙拚$17，呢個價錢簡直係超現實，呢個係我十幾年前讀中學既外賣價錢。我差不多每個星期都會幫襯，因為價錢太吸引，如果咁都唔幫襯，好對唔住自己，食物質素完全唔差，當然你唔可以同一級燒味飯店比較，但係將貨就價，呢個飯盒肯定係超班。

對於我大炮仔黎講份量係比食物質素更加重要，食吾飽會好唔開心。老闆員工絕吾孤寒，永遠要塞爆個飯盒先滿意，有相為證。

$17 今時今日食到呢個飯盒，我覺得好欣慰，企業良心，真係好益街坊。極力推介。

P.S. 真心覺得比起大集團經營既連鎖飯店好食好多。（可能係價錢影響味覺）